Psa 16 | TVK | STEP | Suv toto Deved iaxa tetisi Hi Suv, uketeh xol inou, nanesi e xouk xa onamaen ti holesok xil xa misa naxui nou.

Psalms 16

Hi be vatit meulien e di miketeh xol xir

Suv toto Deved iaxa tetisi

1 Hi Suv, uketeh xol inou,
nanesi e xouk xa onamaen ti holesok xil xa misa naxui nou.
2 Nabiteni minuk Iahova xa, “Xouk obe Suv navan.
Holesok xil vus navan xa bos nggo visaluk.”

3 Moletin xil na Hi labe eo e labos pupu,
ieok bei pupu tengan nate visal xil.
4 E ngan xil xa langgusil hi sav xil,
di lalihi pangasien bemei e xil.
Melele xa xil limot mi hi nae, inou ninamos ti natel xil;
e ninahusil xil ti melele xa lileh sanien eo nae xil.

5 Iahova, xosali meulien navan de hem,
e melengien xil xa ti imei, ti ninesi e xouk xa usa holesok xil xa nihe terume ni.
6 Hi, xouk obos oli tan mu holesok sav xil vus e ut etan xa nakila namur xati.
Nabesi nou tengan namur xat xouk kestang.
7 Iahova, namesuk vengan xa di opisen ni minou naha xa ti nipol ni.
E, e vongien mun, di osak ni nou nakil suse xa momal tengan nihusili.
8 Iahova, vehakut naling xouk odiamu ni nou.
Vengan xa odat sangas, neta ti namulul ni nou.

9 Misak ni, nabesi pupu ni nou, tinok polu ni sien,
e uluk takan ti,
10 vengan xouk di osikoe xol nou tengan ninava ti e ut te maten.
Vehakut, di napol ni holesok xil vus xa osa ni minou.
Ve rin ak, onasin nou ti ninave von maten.

11 Pisen suse te meulien mi nou.
Nalonge bos pupu vengan ode visal nou;
vehakut, sien di visaluk.